பள்ளிகளில் பிளாஸ்டிக்குக்கு கட்டாயத் தடை!

1/10/2019 2:36:04 PM

பள்ளிகளில் பிளாஸ்டிக்குக்கு கட்டாயத் தடை!

நன்றி குங்குமச் சிமிழ் கல்வி-வேலை வழிகாட்டி

தமிழகம் முழுவதும், 2019ம் ஆண்டு ஜனவரி 1 முதல், பிளாஸ்டிக் தடைச் சட்டத்தை அமல்படுத்த உள்ளதாக, தமிழக அரசு அறிவித்துள்ளது. அரசு அலுவலகங்கள், பள்ளி, கல்லுாரிகள், தனியார் நிறுவனங்கள், பொது இடங்கள் உள்ளிட்டவற்றில், பிளாஸ்டிக் தடை அமலுக்கு வருகிறது. ஒரு முறை பயன்படுத்தும் பிளாஸ்டிக், பாலித்தீன் மற்றும் மறுசுழற்சியில் வராத, மக்காத பிளாஸ்டிக் பொருட்களின் உபயோகம், இந்தத் திட்டத்தில் தடை செய்யப்படுகிறது.

இதற்காகத் துறை வாரியாக விழிப்புணர்வுக் கூட்டங்கள் நடத்தப்படுகின்றன. அதன்படி, பள்ளிக் கல்வித்துறையில், மாவட்ட முதன்மைக் கல்வி அதிகாரிகள் மற்றும் மாசுக் கட்டுப்பாட்டு அதிகாரிகள் இணைந்த, ஒருங்கிணைப்புக் கூட்டம் நடத்தப்பட்டுள்ளது. அதன்படி, மாணவர்கள், ஆசிரியர்கள், ஊழியர்கள் உள்ளிட்டோர் தடை செய்யப்பட்ட பிளாஸ்டிக் பொருட்களை எடுத்துவரக்கூடாது என உத்தரவிடப்பட்டுள்ளது.

‘நொறுக்குத் தீனி, மதிய உணவு போன்றவற்றை, இதுபோன்ற பிளாஸ்டிக் டப்பாக்களில் எடுத்துவரக்கூடாது. மறுசுழற்சி செய்யமுடியாத, தெர்மாகோல் போன்றவற்றை, வகுப்பறை செய்முறை கற்றலில் பயன்படுத்தக்கூடாது’ என்றும், அறிவுறுத்தப்பட்டுள்ளது. வரும் ஜனவரி 1ம் தேதி முதல், எந்தச் சுணக்கமும் இன்றி, பள்ளி வளாகத்தை, பிளாஸ்டிக் இல்லாத பசுமை வளாகமாக மாற்ற வேண்டும் என்றும் உத்தரவிடப்பட்டுள்ளது.

X